Loolanka Xoogan Ee Ka Dhaxeeya AI-da Iyo Qofka Shaqaalaha Ahi

Waxaynu ku jirnaa xilli kala guur ah, AI-da ayaa dhawaanahan danbe laga arkayay is bedelo waa-weyn, gaar ahaan suuqa shaqada, iyadoo si toos ah u bedeshay shaqooyinka qaar.

Waana halka ay ka dhalatay su’aasha ah: “AI-du Miyay Bedeli Doontaa Shaqooyinkeenii?“.

Shaqooyino badan, oo ay markii hore aadanuhu qaban jireen ayaa waxa haatan qabta AI-da, waliba si ka dhakhsiyo badan, kana khaladaad yar.

AI-du waa tignoolajiyad awood u leh in ay si iskeed ah wax barto, u falanqeyso xogta, isla markaana u gaarto go’aanno, iyada oo aanay faragelin bini’aadameed u baahanin.

Tani waxay si toos ah u saameyneysaa shaqooyin badan oo ay horay u qaban jireen bini’aadamka, sida xisaabinta, adeegyada macaamiisha, turjumaanimada, iyo xitaa warshadaha.

Cabashooyinka iyo cabsida laga qabo AI-da waa kuwo dhawr ah, hasa ahaatee, mid ka mid ah cabsiyada laga qabo AI-da, ahan kan ugu weyn ayaa ah shaqo luminta.

Shaqooyin badan ayaa maanta si fudud ay AI-du u qaban kartaa, taasoo sababtay in ay shirkado badan u wareegaan AI-da, maadaama ay AI-du mararka qaar ka wax-soo-saar badan tahay aadanaha, kana khaladaad yar tahay.

Arintan ah in ay AI-du la wareegi doonto shaqooyin badan ayaa abuurtay walaac iyo cabsi badan, iyadoo si toos ah ugu fadhiisanayaan boosaskii ay markii hore shaqaalayaal caadia ah ku fadhiisan jireen.

Haddaba Waa Maxay Xalku?

Si fudud, xalku waa inaadan ka baqain AI-da, ee waa inaad adeegsataa, oo aad ka faa’idaysataa.

Waxaana la yidhaahdaa: “AI-du ma bedeli doonto aadanaha dhan, ee waxay bedeli doontaa qofa aan AI-da lafteeda adeegsan“.

Si looga fogaado loolanka tooska ah ee u dhexeeya AI-da iyo shaqaalaha, waxaa lama huraan ah in la sameeyo hab iskaashi.

Taas micnaheedu waa in la barto sida ay AI-du u shaqayso, sida looga faa’idaysto, sida loo kaashado, sida wax looga barto, halkii laga baqi lahaa.

Dhanka kale, dowladda, hay’adaha waxbarashada, iyo shirkadaha waa in ay si wadajir ah u sameeyaan kulano kor loogu qaadayo xirfadaha shaqaalaha (upskilling) iyo tababarro cusub oo la jaanqaadaya tiknoolajiyadaha cusubi.

Sidoo kale, sharciga iyo siyaasadda shaqada waa in la waafajiyaa isbeddelka tignolojiyadeed ee hareeraheena ka dhacaya, si loo ilaaliyo xuquuqda shaqaalaha, oo aanay noqon kuwo si sahlan looga takhalusi karo.

Gabagabadii

Loolanka u dhexeeya AI-da iyo qofka shaqaalaha ahi waa loolan dhawaanahan danbe bilawday, marba marka ka sii danbaysana sii xoogaysanaya.

Hasa yeeshee waxaa muhiim ah in la fahmo oo lagu baraarugo in uusan loolankan ahayn mid lagu khasban yahay, oo ay tahay in la galo, oo lala tartamo AI-da.

AI-du waa aalad, sida loo adeegsado ayaana go’aaminaya saamaynteeda, hadii aad si wacan u adeegsato shaqadaada ayay xoojinaysaa, hadii aad iska idho-tirtana way ku badelaysaa.

Gunaanadka qormadan, waa in aan la iska idhno-tirin AI-da, ee waa in la adeegsado.

Academy-deena waxaad ka baran kartaa xirfadaha qaar ee kuu suuragalinya inaad AI-da adeegsato, sida inaad dhisto AI, adigoo adeegsanaya Python, iwm, waxaadna ka helaysaa koorsooyino mustabalka dhaw ama fogba wax ka bedeli doona.